அதிர்ஷ்ட விதிகளின் எதிர்வினை

அதிர்ஷ்ட விதிகளின் எதிர்வினை

பள்ளம் மேடு குண்டு குழிகள் மிகுந்த சாலையில்

எவ்வளவு மெதுவாக

ஆடி அசைந்து அழகாகச் செல்கின்றன வாகனங்கள்

 

அப்பா கொடுத்து விட்டுப் போனது பத்து ரூபாய்

அம்மாவின் கையிலிருந்து கிடைத்தது ஏழு ரூபாய் இருபது பைசா

வீட்டுக்காரர் எடுத்துக் கொண்டது இரண்டு ரூபாய் எண்பது பைசா

 

மழையடித்தால் விடுமுறை

அதிக வெயிலடித்தால் விடுமுறை

அதிர்ஷ்டம் செய்த குழந்தைகள்

அன்று முழுவதும் விளையாடிக் கொண்டிருக்கிறார்கள்

ஒவ்வொரு விடுமுறைக்கும்

ஓர் எதிர்வினை இருக்கிறது

என்று நியூட்டனின் மூன்றாம் விதியை

மனப்பாடம் செய்யும் குழந்தைகளுக்குச்

சனிக்கிழமை வேலை நாளாகிறது

*****