அதிர்ஷ்டத்தின் பாதை

அதிர்ஷ்டத்தின் பாதை

உங்களிடம் அதிர்ஷ்டம் இருந்தால் எல்லாருக்கும் கொஞ்சம் தாருங்கள்

எத்தனைப் பேருக்கு அதிர்ஷ்டம் இருக்கிறது

இருப்பவர்கள் இல்லாதவர்களுக்குத் தாருங்கள்

துரதிர்ஷ்டத்தைச் சுமப்பவர்கள் நாட்டில் அதிகம்

அவர்களின் சுமையை உங்களையும் சுமக்கச் சொல்லவில்லை

அவர்களின் சுமையை இறக்கி வைக்க உதவுங்கள்

அதிர்ஷ்டத்தின் திசை தெரியாதவர்களுக்கு வழிகாட்டுங்கள்

அதிர்ஷ்டத்தை விலக்குபவர்களிடம் ஈர்ப்பதைச் சொல்லிக் கொடுங்கள்

துரதிர்ஷ்டத்தின் பக்கம் தலை வைத்து படுப்பவர்களிடம்

அதிர்ஷ்டத்தின் பக்கம் தலைவைத்துப் படுக்கச் சொல்லுங்கள்

எதில் அதிர்ஷ்டம் இருக்கிறது என்பது தெரியாததால்

எல்லாவற்றிலும் தேடச் சொல்லுங்கள்

எதைச் செய்தால் அதிர்ஷ்டம் கிடைக்கும் என்பது

எவரும் அறிய முடியாத ரகசியம் என்பதால்

எல்லாவற்றையும் செய்யச் சொல்லுங்கள்

எந்த இடத்திலும் புதையல் இருக்கும் என்பதால்

எல்லா இடத்தையும் தோண்டிப் பார்க்கச் சொல்லுங்கள்

அதெப்படி எல்லாவற்றையும் தேடி

எல்லாவற்றையும் செய்து

எல்லா இடங்களிலும் தோண்டி முடியுமா என்றால்

முடியாதவர்கள் எப்படி

அதிர்ஷ்டத்தின் விலாசத்தை அடைய முடியும்

எங்கிருக்கும் என்று தெரியாத ஒன்றை

எல்லா இடங்களிலும் அலசிப் பார்க்காமல்

எப்படிக் கண்டுபிடிக்க முடியும்

எந்த நேரத்தில் வரும் என்று தெரியாத ஒன்றுக்காக

எல்லா நேரத்திலும் காத்திருக்க வேண்டும்

எல்லா நேரத்திலும் எல்லா இடத்திலும் இருங்கள்

எந்தக் கதவு திறக்கும் என்று தெரியாத போது

எல்லா கதவுகளையும் தட்டிப் பாருங்கள்

ஆயிரத்தில் ஒன்று அதிர்ஷ்டத்திற்கு அடியெடுத்து வைக்கிறது

அதற்காக 999 அடிகளை நீங்கள் தவிர்த்து விட முடியாது

எல்லா அடிகளையும் கவனமாக எடுத்து வையுங்கள்

ஏதோ ஒரு அடியில் நீங்கள் மாய உலகில் நுழைவீர்கள்

அங்கு நுழைந்து விட்டால்

நீங்கள் நினைப்பது நடக்கும்

அதற்கு நீங்கள் எல்லா இடங்களிலும் நுழைந்து பாருங்கள்

அதிர்ஷ்டத்தின் தீண்டலுக்கு முன்பாக

நீங்கள் நிறைய துரதிர்ஷ்ட தீண்டல்களைப்

பரிசோதித்துப் பார்த்திருக்க வேண்டும்

முடிவில் உங்கள் பரிசோதனையின் முடிவுகள்

அதிர்ஷ்டத்தின் தீண்டல்களை அறிய வைக்கும்

அறிந்து கொள்ளும் வரை அறிதலை நிறுத்தாதீர்கள்

அடையும் வரை பயணத்தைப் பாதியில் முடிக்காதீர்கள்

நிறைய முயன்று வீட்டீர்கள்தான்

இன்னும் கொஞ்சம் முயலுங்கள்

உங்கள் துரதிர்ஷ்டங்கள் சோர்ந்து போகும் வரை

அனைத்தையும் எதிர்கொள்ளுங்கள்

கண்களை மூடி விடாதீர்கள்

மூடிய கண்களுக்குள் தெரிவதெல்லாம் துரதிர்ஷ்டங்கள்

அதிர்ஷ்டம் புலப்படும் போது

உங்கள் கண்கள் திறந்திருக்க வேண்டும்

*****