முரண்களின் சுழற்சி

முரண்களின் சுழற்சி

இந்த வேளையின் பசி அடங்கிய பிறகு

அடுத்த வேளை பசிக்க தொடங்கும்

இத்தோடு முடித்துக் கொண்டு

இனி இந்தப் பக்கம் வாராதே என்ற

உன் வார்த்தை உண்மையாய் நடந்து கொள்வது எப்படி

பசி துரத்தும் வேளைகளில் எல்லாம்

உன்னைத் தேடி வருவதைத் தவிர வேறு வழியேது

முடிவுக்கு வர மறுக்கும் உலகம்

தொடர்ந்து சுற்றிக் கொண்டிருப்பது தெரியாதா உனக்கு

வாக்குறுதிகள் அளிப்பதும் மீறுவதும்

இரவும் பகலும் போல மாறி மாறி நிகழ்வன

காற்றை உள்ளிழுப்பதும் வெளித்தள்ளுவதும்

உயிர்த்தலுக்கான ஏற்பாடுகளாக அமைக்கப்பட்டு விட்டன

நீ நிலையாய் அமர்ந்திருக்கும் வாகனத்தில்

சக்கரங்கள் இயங்குவதைப் போல

ஒன்றுக்கொன்று முரண்பட்டு இயங்குதலின்றி

வார்த்தைகளை மீறாது வாழ்க்கையை இயக்குவதேது

பசி தீர்த்த அன்பினது நன்றிக்கான நொடி மறைந்து

பழி வாங்கும் வன்மத்தினது குரூரம் பிறக்க

பசி தீர்க்க மறுக்கும் உன் அதிகாரமும் காரணமாக இருக்கலாம்

சுழன்று கொண்டிருக்கும் சக்கரத்துக்கு மேலேது கீழேது

அன்பும் குரூரமுமாய்ச் சுழன்று கொண்டிருக்கும் வாழ்க்கைச் சக்கரம்

*****