சொல்வதில் ஏதுமில்லை

மறித்து நிற்றல்

மழை பெய்யட்டும்

புயல் வரட்டும்

வெள்ளம் உண்டாகட்டும்

எனக்கு முன் கணிப்புகளில் விருப்பமில்லை

பெய்யும் மழைக்கு

நடந்து போகப் பாதை வகுத்தோமா

வீசும் புயல்

கடந்து போக நெகிழ்ந்து கொடுத்தோமா

ஓடும் வெள்ளம்

வழிந்தோட தடைகளை எடுத்தோமா

வெறு வழியில்லை

நம் வழியில் குறுக்கிடாது இருக்க

அவைகளின் வழியில்

மறித்து நிற்பதற்கில்லை

*****

சொல்வதில் ஏதுமில்லை

நிச்சயமாகச் சொல்கிறேன்

அதற்கும் எனக்கும் என்ன சம்பந்தம்

அதுவாக வருகிறது

அப்புறம் போகிறது

அதை இறை என்று சொன்னால்

மதவெறியர்கள் ஆவீர்கள்

ஞானம் என்று சொன்னால்

பைத்தியம் பிடித்தவர்கள் ஆவீர்கள்

பிரபஞ்சத்தில் ஒரு பூ ஏன் உதிர்கிறது சருகாகிறது

உங்களால் கண்டுபிடிக்க முடியுமா

ஒரு பூ அதையெல்லாம் யோசித்துக் கொண்டிராது

மலர்கிறது உதிர்கிறது சருகாகிறது

*****