சேவைப்புயல் மறைந்து விட்டார்

சேவைப்புயல் மறைந்து விட்டார்

இந்த இரவும் இப்படி விடியுமோ

சூரியன் உதிக்காதிருந்தால் நன்றாயிருந்திருக்கும்

அவசரப்பட்டு உதித்து விட்டது

இனிமேல் நிறுத்துவது சாத்தியப்படாது

வெயிலை அதீதமாய்க் கக்காமல் இருந்தால் சரி

மழை வந்தால் பொருத்தம்

சிறு தூறல் கூட போதும்

மாநகரமே அழுகிறது

மாநிலமே அழுகிறது என்பதை விட

வானமும் அழுகிறது என்று எழுதுவது

அவ்வளவு பொருந்திப் போகும்

மேகம் நினைத்தால் கவிஞர்களுக்கு உதவலாம்

மற்றபடி

காற்று நின்று விட்டது

நாங்கள் சுவாசிக்க மறைந்து விட்டோம்

கடலலைகள் கரைந்து விட்டன

எங்கள் கண்களை கடலலைகளாக்கி விட்டீர்

எங்கள் நிலா உதிர்ந்து விட்டது

எங்கள் வானம் பகலிலே இருண்டு விட்டது

(வெயில் சுட்டெரிப்பது வேறு விசயம்)

இப்படி நிறைய எழுதிக் கொள்ளலாம்

நான் எதிர்பார்க்கவில்லை

சேவைப்புயல் மறைவில்

நிறைய கவிஞர்கள் உண்டாகி விட்டார்கள்

ஒரு பெரிய மனிதர் மறைந்தால்

கவிஞர்கள் ஏகப்பட்டோர்

ஆஸ்பிட்டல் செலவின்றி அறுவை சிகிச்சையின்றி

சுகப் பிரசவமாகி விடுகிறார்கள்

மற்ற பெரிய மனிதர்கள் விரைவில் செத்தால்

மற்றுமுள்ளோரும் கவிஞர்களாக மறுபிரசவம் ஆகி விடுவார்கள்

நம் கையில் என்ன இருக்கிறது

எமனில் கையில் எல்லாம் இருக்கிறது

பெரிய மனிதர்கள் இறப்பதும் கவிஞர்கள் பிறப்பதும்

*****